Европската унија би сакала и Косово да учествува на Самитот на Процесот на соработка на земјите од Југоисточна Европа (ПСЈИЕ) што ќе се одржи на 1 јуни во Охрид, изјави денеска за Танјуг шефот на Делегацијата на ЕУ во Србија, Венсан Дежер.
Српското Министерство за надворешни работи вчера објави дека Косово не е покането на Самитот во Охрид на барање на Србија и две други земји-членки на ПСЈИЕ, кои се повикуваат на статутот на организацијата што предвидува на Самитот да учествуваат единствено суверени и признати држави.
Дежер во однос на изјавата на косовскиот претседател Атифете Јахјага дека барањето е во спротивност со постигнатиот договор во Брисел за нормализирање на односите меѓу Србија и Косово, нагласи дека „реално гледано“ тој договор не влијае на ПСЈИЕ.
– Сепак во името на евопскиот дух, во вака позитивен момент како што е постигнувањето на договорот, би сакале да видиме дека Косово исто така е вклучено, бидејќи ПСЈИЕ на одреден начин дава политичка насока на регионалната соработка, истакна Дежер.