Приштина и Белград „се трудат и бараат можен компромис“ изјави денеска известувачот на Европскиот парламент за Србија Јелко Кацин. Тој истакна дека е можно до крајот на оваа недела или најдоцна во понеделник наутро „да се види панделката на овој пакет и здравица за потпишување на договорот“.
– Договорот меѓу Белград и Приштина ќе има исто значење како и крајот на Студената војна за Западна Европа! Тоа е вистинско помирување меѓу Србија и Косово. Тоа би создало сосема поинаква ситуација и за косовските Срби, нагласи Кацин.
Европскиот парламент денеска со големо мнозинство го усвои извештајот на Јелко Кацин за напредокот на Србија на патот кон ЕУ и и предложи на Европската комисија да и додели на земјата датум за почеток на преговорите за членство во Унијата.
– ЕП ги поддржува напорите на Србија што е можно побрзо да почне во отворање на поглавјата 23 и 24, што значи дека треба да добие датум за почеток на преговорите. Наша проценка е дека успехот на Србија и Косово ќе биде од големо значење за поширокиот регион, за сите соседи, па и за ЕУ. На крајот мораме да ја разбудиме и Македонија која веќе осум години има статус на кандидат, а се уште нема направено историски компромис, кој би и овозможил да добие датум, нагласи Кацин.
Тој појасни дека очекува в понеделник, на 22 април, сето ова да го земат предвид и министрите за надворешни работи на ЕУ. Конечниот збор за европскиот пат на Србија ќе го даде Европскиот совет на Самитот кој ќе се одржи на 28 јуни.