Кошаркарките на Студент од Скопје забележаа убедлива победа над екипата на „Патриот 2016“ во рамки на денешното гостување во Делчево како дел од натпреварите од 10-тото коло од првата женска кошаркарска лига. По 40 минути игра на паркетот во Делчево, „патриотките” постигнаа 44 поени, наспроти вкупно 90-те поени на гостинките од Скопје. За тренерот на делчевки Љупчо Петровски, поразот е заслужен, а најважно за домашната екипа е што се врати капитенот Ангеловска, која не настапи на вчерашниот дуел со екипата на Баскет Кам кој делчевки го загубија.
-Ана Ангеловска повторно беше во тимот и беше најефикасен поединец со 15 поени. Меѓу подобрите наши поединки со 12 поени и 15 скокови ќе ја издвојам Теодора Атанасовска, кошаркарки кои заедно со Ана Ангеловска, беа главни носителки во играта. Нема разочарување и по овој пораз, бидејки и сами знаете дека сме млада екипа. Секое искуство со подобри екипи, е драгоцено искуство за нас, рече по натпреварот Петровски.
Во ова коло, екипата на Баскет Кам, како и што навестија кошаркарките од М.Каменица, забележа победа на гости кај Пробаскет Академија со 45:62 и ги задржа шансите за учество во плеј-оф натпреварите.
Во следното 11 коло од првата женска кошаркарска лига, кошаркарките на „Патриот 2016″ гостуваат кај тимот на Гостивар, додека Баскет Кам ќе ја угости екипата на Пантери.