Скотланд Јард и експерти на британската полиција за хемиска, биолошка и нуклеарна контаминација, трагаат во куќата на Борис Березовски, во Аскот, по супстанци и материјали кои би можеле да ја предизвкуаат неочекуваната смрт на рускиот олигарх и политички дисидент, кој од 2000 година живееше во Велика Британија.
Засега нема објаснување за тоа дали нешто сомнително е откриено, освен што Скотланд Јард ја третира смртта на Березовски како „необјаснета“.
Борис Березовски (67) беше најден мртов во својата куќа од некои од членовите на неговото обезбедување. Полицијата била известена за смрта на Березовски, вчера по 15 часот по локално време и го презела мртвото тело на олигархот за детално испитување.
Березовски побегна од Русија во Лондон, по судирот со тогаш за првпат избраниот руски претседател Владимир Путин, кому пред тоа му помагаше да влезе во Кремљ. Во Велика Британија стана најостриот критичар на Путин и на неговата власт, па беше означен како најпознатиот дисидент во посткомунисточка Русија.
Неговите блиски пријатели откриваат дека Березовски бил под стрес по загубата на спорот со Роман Абрамович за околу шесет милијарди долари. Откако го загуби судскиот спор пред лондонскиот суд, Березовски мораше да ги плати и судските трошоци за кои се верува дека изнесуваат околу 100 милиони долари.
Некогаш најбогатиот човек во Русија, за прв пат се соочи со финансиски проблеми, што се верува дека е причина за неговата депресија и за преживеаниот стрес.
Полицијата не ја отфрла можноста за срцев удар, но Березовски беше голем пријател и подржувач на убиениот дисидент Александар Литвиненко кој беше отруен со радиоактивниот полониум 212 па Скотланд Јард затоа одлучи да трага и по можноста како причина за смрта на Березовски да биде и присуството на некој вид контаминација во неговата куќа.