Во интервју за неделникот „НИН“, претседателот на владата на Србија, Ивица Дачиќ, вели дека десет години народот на Србија се лаже дека Косово е српско, а дури и се официјализирало со уставот на Србија.
– Се лажеше дека Косово е наше, а тоа дури беше официјализирано со уставот. Денес тој ист устав нималку не помага. Претседателот на Србија не може на Косово. Ни премиерот. Ни министрите. Ни полицијата. Ни војската – вели премиерот.
Агенцијата Ројтерс оценува дека изјавата на Дачиќ е најновиот знак дека Белград го направил историскиот пресврт во желбата да обезбеди преговори за прием на Србија во Европската Унија, пренесува Блиц.
Во текстот по повод годишнината од убиството на Зоран Ѓинѓиќ, Дачиќ наведува дека Косово речиси десет години е табу тема, дека никој официјално не зборувал, а се зборувало само за „бајки“.