Министерот за одбрана на Велика Британија денеска соопшти дека британските војници ќе ја напуштат Германија порано отколку што се очекуваше-до 2019 година, пишува лондонски „Дејли мејл“.
Околу 10.000 војници ќе се вратат во татковината до крајот на 2016 година, а преостанатите околу 4.500 во 2019 година.
Британските војници се присутни во Германија од крајот на Втората светска војна кога дојдоа со цел да ја обезбедат стабилноста на земјата по падот на нацизмот, а останаа за да ги одвратат Русите од напредувањето од исток за време на Студената војна, пишува весникот.
Министерството за одбрана смета дека нивното враќање ќе значи заштеда од 240 милиони фунти годишно.
Од друга страна, тоа ќе значи и големи вложувања за обезбедување на нивното сместување во Велика Британија, бидејќи за нив и нивните семејства ќе се направат седум гарнизони.
Во овие седум гарнизони низ Велика Британија за станови и за инфраструктура ќе се инвестираат околу 1,8 милијарди фунти.