Четворица новинари во обраќање до Советот за безбедност на Обединетите нации ги повикаа светските лидери да сторат повеќе со цел да ги заштитат репортерите додека ги ризикуваат своите животи, извршувајќи ги своите задачи во конфликтните региони ширум светот.
Еден од новинарите, Ричард Енгел од Ен-Би-СИ изјави дека заштитата на новинарите денес можеби е потешка од кога и да е „бидејќи прво мора да се реши прашањето, кој е новинар, а кој активист“.
– Сега сите сме блогери и бунтовници со камери. Повеќе апсолутно нема почит кон новинарите со кариера, рече Енгел, кого кон крајот на минатата година го киднапираа и пет дена како заробеник го држеа приврзаници на режимот во Сирија.
Тој додаде дека професионалните новинари треба да бидат признати и заштитени на сличен начин како и меѓународните дипломати. Во Советот за безбедност говореше и уредничката во агенцијата Асошиејтед прес, Кетлин Керол, која изјави дека новинарите се „ушите и очите на јавноста“ во конфликтите и војните, бидејќи одат таму, каде другите не можат и прашуваат работи за кои обичните луѓе не смеат да прашаат.
Состанокот на новинарите и воените известувачи со членови на Советот за безбедност е одржан на иницијатива на САД.