„Јагуар“ објави нова видео снимка како најава за моделот „Ф-Пејс“ што ќе биде претставен на еден од големите авто-салони во блиска иднина.
Засега е познато дека кросоверот ќе се темели на концептот „C-X17“ од 2013 година. Двете возила треба да имаат многу сличен дизајн, а ќе се разликуваат само во некои детали.
„Јагуар Ф-Пејс“ е поставен на модуларна алуминиумска платформа.
Како што тврдат во компанијата, во прашање е лесна конструкција со голема цврстина и крутост, а заради својата модуларност можено е платформате да се прилагоди на моделите од различни автомобилски сегменти.
Понудата на мотори ќе биде слична како кај лимузината „XЕ“.
Треба да се смета на 2.0 турбо-дизел единицата што ќе развива до 200 кс, како и на два бензинца: дволитарскиот мотор со максимална сила од околу 240 кс и 3.0-литарскиот В6 со компресор што ќе произведува околу 340 кс.
На располагање најверојатно ќе биде и моќниот 5.0-литарски В8 мотор што ќе се вградува во топ верзијата.
„Јагуар“ тврди дека моделот „Ф-Пејс“ ќе внесе освежување во сегментот на луксузни кросовери, комбинувајќи го спортскиот дизајн и возните карактеристики со пространата кабина и премиум содржините.
Кога на почетокот на 2016 година ќе се појави на пазарот, таму ќе го дочекаат ривалите „Порше Макан“, „Мерцедес ГЛЦ“, „БМВ Х3“ и „Ауди Q5“.