Во Охрид почна снимањето на играниот филм „Дедо и внук“

Во Охрид почна снимањето на играниот филм „Дедо и внук“

На неколку локации во Охрид вчера почна снимањето на играниот филм „Дедо и внук“, на охридскиот режисер Илија Пиперкоски.

Како што беше истакнато на прес-конференцијата одржана денеска, ова е првпат во историјата на македонската киноматографија сценарист и режисер да биде охридски автор, како и материјалот за целиот филм, целото снимање од почеток до крај да биде во Охрид.

Пиперкоски за својот прв проект во категоријата игран филм, истакна дека се исполнува неговата желба да снима филм во Охрид.

– Многу се радувам што денеска после многу подготовки сме тука на првата клапа од снимањето на играниот филм „Дедо и внук“, а наредната седмица почнува и прикажувањето на мојот документарен филм за Охрид. Беа потребни многу напор, работа и логистика изминатите четири години за да стигнеме до тука – до снимање игран филм, и до премиера на документарен филм, рече тој.

За самиот филм Пиперкоски не сакаше многу да зборува ниту да открива за содржината, освен дека се работи за емотивна приказна, однос меѓу дедото и внукот и што се она постарите сакаат да ги научат поколенијата.

Главните улоги во филмот ги толкуваат Дејан Лилиќ како внукот и Салаетин Билал како дедото.

Лилиќ кој во филмот глуми кардио-хирург, рече дека сега разбира дека воопшто не им е лесен животот на лекарите.

– Никола ликот кој го играм, покрај што има тешка работа, во животот му се случуваат низа интересни, невообичаени, чудни препреки… Во еден миг целиот негов живот се врти наопаку, рече Лилиќ изразувајќи уверување дека составот на екипата, продукцијата, режијата се е склопено така да излезе еден добар македонски продукт.

Неговиот колега Билал, инаку дедото во филмот, за својата улога рече дека разработува интересен случај, чест во денешницата, старите луѓе да бидат подзаборавени од најблиските.

– Многу интересна улога и што е најважно, соработката со режисерот е исклучително пријателска, со договарање, пријатни моменти во работата, мислам дека така ќе биде се до крајот на снимањето, така што ќе направиме добар филм, рече Билал, кому ова му е 36-то појавување во филм.

Продуцентот на филмот Огнен Антов пред медиумите изрази огромна благодарност до Агенцијата за филм која финансиски го поддржа проектот, како и до граѓаните и Локалната самоуправа на Охрид.

– Планираме премиерата на филмот да биде токму во Охрид, а потоа по останатите градови. Некако логично и е, Илија е од тука, снимаме тука, така што тоа е идејата да стартуваме оттука, рече Антов.

Авторска екипа уште ја сочинуваат директорот на фотографија од Романија – Патру Паунеску, сценографијата во филмот ја креира Владимир Зафирковски, костимограф е Жаклина Крстевска, автор на шминката и маските е Клаудиа Мусат, снимател на звукот е Мариус Станеску.

Снимањето на материјалот за „Дедо и внук“ почнува во истата куќа каде се одвиваше главното дејство на „Мирно лето“ во 1960 година. Предвидено е снимањето на материјалот за филмот да заврши некаде до 14 мај, а филмот што е македонско-романска продукција да биде готов некаде до крајот на годината, за да може да учествува на некој од филмските фестивали наредната година.

Поврзани вести

Две Гран-при награди за кочанските ученици на фест... Вкупно осум награди од кои две Гран-при освои тимот ученици од ОУ „Никола Карев“ на 9. „Марковденски средби за деца и поети“ што се одржа во Бачка ...
Девет концерти на 16.ОфФест од 25-ти до 28 мај... Девет концерти и еден документарен филм во четири дена се на програмата на 16-тиот ОфФест, кој во организација на Скопски џез-фестивал ќе се одржува о...
Актери од Крива Паланка на Меѓународен театарски ф... Претставата „Не обложувај се на Англичани“ во изведба на актерите од драмското студио при Центар за култура Крива Паланка беше изведена на Меѓународни...
Награда за документарниот филм „Езеро од јаболка“ ... Документарниот филм „Езеро од Јаболка“ поддржан од Програмата за развој на Обединетите нации (УНДП) и Швајцарската агенција за развој и соработка ја д...
По втор пат распишан конкурсот за избор за најдобр... Општина Куманово по втор пат го распиша конкурсот за избор за најдобра фотографија со мотиви од Куманово – „Мое Куманово“. Конкурсот се распишува...
Книга за нуклеарната катастрофа во Чернобил од ноб... Издавачката куќа „Антолог“ ја објави книгата „Чернобилска молитва“ од белоруската авторка Светлана Алексиевич, добитничка на Нобеловата награда за лит...