Награди од конкурсот за студентски плакат „Република Македонија како туристичка дестинација“

Награди од конкурсот за студентски плакат „Република Македонија како туристичка дестинација“

Ана Петрова и Иван Дургутовски – студенти на Факултетот за арт и дизајн од Европскиот универзитет и Анастасија Јовческа – студентка на Факултетот за дизајн и мултимедија од ФОН Универзитет се добитници на трите главни награди на Конкурсот за студентски плакат на тема „Република Македонија како туристичка дестинација“ во организација на Здружението на графички дизајнери Плакарт, Музејот на град Скопје и Амбасадата на Полска во Македонија.

Проектот во чии рамки беше организиран конкурсот почна во април 2016 година со изложбата „Полската школа на плакат“, која на македонската публика и ја претстави една од најстарите и најкарактеристичните школи за плакат.

Наградените ќе имаат студиско патување во Полска во 2017 година и, како што информираат организаторите, ќе имаат можност да патуваат по стапките на големите полски мајстори на плакат и да се запознаат и да ги проучат вредностите и значењето на оваа маркантна школа за дизајн, искуство што ќе им служи во развојот на нивната кариера.

Ана Грковска, студентка на Факултетот за архитектура од Универзитет „Св. Кирил и Методиј“, и Лара Маринковиќ, студентка на Семос – Академијата за дизајн, се добитнички на почесно признание и можност да соработуваат со Музејот на град Скопје, да одржат студентска пракса и да учествуваат во подготовка на промотивните материјали на во оваа значајна културна институција во текот на 2017 година.

Специјална награда му е доделена на Кристијан Арсовски, студент на Факултетот за архитектура од Универзитет „Св. Кирил и Методиј“, а добитник на специјалната награда е Томислав Акимовски, студент на Факултетот за ликовни уметности од Универзитетот „Св. Кирил и Методиј“.

– Главната цел на конкурсот за студентски плакат на тема „Република Македонија како туристичка дестинација“ беше добивање плакат со современ израз како дизајнерски производ, преку кој ќе се промовира како земја со богато културно наследство, зачувани природни богатства и богата духовна ризница. Преку одбраната тема, организаторите одлучија да стават акцент на прашањето на квалитетно дизајнирана промоција на Република Македонија во светот како атрактивна туристичка и културна дестинација, наведуваат организаторите.

За наградените автори одлучуваше жири во состав Лазе Трипков – директор на Музејот на современа уметност, Томислав Микулчиќ – директор на Музејот на град Скопје, Ласко Џуровски – основач на Тотем дизајн студиото, Ришард Каја – реномиран плакатист и илустратор од Полска и Јацек Мултановски – амбасадор на Полска во Македонија. Тие направија селекција од пристигнати 123 плакати од седум македонски факултети по визуелни комуникации или сродни насоки.

Изложбата на студентски плакати со тема од конкурсот вчеравечер беше отворена во Музеј на град Скопје. Таа вклучува 50 студентски дела, а по претставувањето во Скопје ќе гостува во домовите на култура во 18 градови низ Македонија. Изложбата во МГС е надополнета со поставка „Мал плакат“, составена од 20-ина цртежи од деца на истоимената тема, добиени како резултат на работилницата која полскиот илустратор и плакатист Ришард Каја ја менторираше во ноември 2016 во рамките на 9. Скопје постер фестивал.

Поврзани вести

ВИДЕО: Монтажна куќа на копче сама се гради за 8 м... Инжинери дизајнираа монтажна куќа која на притисок на копче сама се изградува за осум минути и е една од многу монтажни објекти кои ги дизајнира брита...
Уметнички за Адидас дизајнирале 50 модели на патик... Адидас ангажирал 12 уметнички за да дизајнираат посебен вид Албатрос патики за секоја држава во САД. Уметничките биле избрани преку страницата Refiner...
ФОТО: Елегантен дизајн на стан во Будимпешта... Во духот на проектите од типот „направи сам“, белгиското дизајнерско студио „Маргеза“ редизајнираше, и опреми стан во центарот на Будимпешта. ...
ФОТО: Лампи од природни материјали... За љубителите на уникатните работи, фирмата „Ел Торент“ ја претстави линијата на лампи „Корд“. Инспирирана од природата, линијата „Корд“ се со...
ФОТО: Печатени шаховски фигури со двојна намена... „Ливинг Чес“ создаде 3Д печатени фигури со двојна намена - шаховски фигури и стилски микро саксии за билки. Целокупниот комплет содржи 32 фигу...
ФОТО: Од обична колиба до современ двокатен дом... Компанијата „А фор Архитекчр“ од Мелбурн трансформираше стара работничка барака во двокатна куќа за млада брачна двојка со деца. Куќата „Валија...