„Заборавени песни“- концерт на Македонската опера и балет за Василица

„Заборавени песни“- концерт на Македонската опера и балет за Василица

Традиционални македонски песни во изведба на Андријана Јаневска и Оркестарот на Македонската опера и балет, специјално подготвени аранжмани од композиторот Илија Пејовски, се на програмата на годинашниот концерт за празникот Василица во организација на МОБ. Режисер е Љупка Јакимовска, а оркестарот ќе го води диригентката Бисера Чадловска.

Концертот е задутревечер, 12 јануари, и е насловен „Заборавени песни“ затоа што се избрани песни кои веќе ретко се слушаат, како „Ѕвонче ѕвони“, „Да сум бистра вода“, „Легнала Ѓурѓа на рамно гумно“, „Три години, лудо, болна лежам“, „Три билбила поев“, „Слегов долу во визбата“…, а две песни од програмата досега воопшто не се изведени. За една од песните ќе биде употребена тамбура на која ќе свири Стевче Стојчевски, изведувач на традиционални инструменти. Солистката Јаневска ќе ја запознава публиката за композициите, кажувајќи за секоја од нив каде била снимена, кој прв ја испеал итн…

Таа е прв солист со целовечерен настап на традиционалниот василичарски концерт, на кој во минатите години учествуваа неколку солисти. Рече дека е почестена поради тоа и затоа што токму неа за солист на целовечерниот концерт ја избрал композиторот Пејовски, кој бил аранжер на нејзината прва песна („Те сакам бескрајно“, во дует со Пеце Огненов на Скопскиот фестивал во 1998). Со концертот „Заборавени песни“ МОБ ќе одбележи 70 години од раѓањето на Пејовски.

– Тој е наш познат музичар, аранжер, пред се на џез-музика. И поради тоа сакавме да направиме интересен спој со нашите традиционални македонски песни, меѓутоа оние кои се подзаборавени и оттаму е насловот на концертот. Традиционалните македонски песни се на некој начин меч со две острици, имаме примери за многу препеани песни, некојпат тоа звучи добро, некојпат лошо. Линијата е тенка и не треба да се премине во некакво сквернавење. Но, уверувам дека овој концерт ќе биде нешто сосема поразлично и со аранжманите на Илија Пејовски ќе дадеме друг призвук, рече Јаневска, нагласувајќи дека и е голем предизвик и тоа што ќе настапи пред своите колеги од МОБ каде што е вработена.

Василичарскиот концерт по повод Стара Нова година, МОБ го организира од 1993 година и се вбројува меѓу најпосетените концерти. За да ја одбележи традицијата на Василица, кога се крши лепче со паричка, МОБ првпат годинава по концертот ќе организира бесплатен коктел на кој ќе има пита со паричка. Парчиња ќе добијат сите посетители, а среќниот кому ќе му се падне ќе биде кум и ќе добие гратис билети за целата сезона на МОБ.

Голем број билети за василичарскиот концерт се подарени во домовите за стари, а приходот од операта „Евгениј Онегин“ од 28 декември вчера бил дониран на Здружението за лица со оштетен вид.

Овој месец во МОБ ќе има два детски викенда – првиот е на 14-ти и 15 јануари кога од 12 часот ќе биде изведена балетската претстава „Снежана и седумте џуџиња“, а следниот викенд, 21-ви и 22 јануари, ќе биде изведен балетот „Оревокршачка“.

На 18 јануари е операта на Моцарт „Дон Џовани“ со голема солистичка екипа од Италија, под диригентство на Џанлука Мартиненги. Последниот ден од месецов ќе биде изведен балетот „Клеопатра“. Претставата е скоро распродадена, а поради големиот интерес МОБ најави уште две изведби, на 2-ри и на 4 февруари.

Новина на МОБ е можноста билетите, покрај на нејзината билетарница, да се купат и во „Југотон“ во ГТЦ на први кат, преку системот karti.com.mk.

Поврзани вести

Отворена ликовна колонија „Михајлово Кавадарци 201... Ликовна колонија „Михајлово-Кавадарци 2017”, годинава посветена на прерано починатиот кавадаречки уметник Ристо Соколов-Сокол беше отворена синоќа во ...
Хуманитарна изложба за собирање средства за болни ... Хуманитарна изложба на дела од повеќе реномирани македонски автори, во спомен на хуманистката Кираца Апостолова, која неодамна почина од рак, ќе биде ...
Меѓународна ликовна колонија „Скопје 2017“... Десет академски ликовни уметници од Македонија и странство ќе учествуваат на Меѓународната ликовна колонија „Скопје 2017“, која почнува денеска во Муз...
Нова збирка поезија „Печатот на вистината“ од Игор... Нова збирка поезија „Печатот на вистината“ од Игор Поп Трајков ќе биде објавена денеска во издание на „Македоника“. Авторот досега има напишано 30 ...
Отворен 8. „МакеДокс“: Дионис ја воодушеви публика... Со македонската премиера на долгометражниот документарен филм „Со љубов“, снимен по сценарио и во продукција на Атанас Георгиев, а во режија на Илија ...
Младите од Вевчани ги изучуваат тајните на традици... Во рамки на Фестивалот за народна култура „Пображење“ што се одржува во Вевчани како содржина е вметната и работилница за традиционално изворно пеење ...